Redondela conta con 15 quilómetros de costa. Neles atópanse varias praias, como Arealonga (Chapela) ou Rande (Cedeira). Pero a praia máis frecuentada, pola veciñanza e polo turismo, sitúase na parroquia de Cesantes. A praia conta con distintos servizos (cafeterías, restaurantes, zonas de recreo…) e cunha zona de aparcadoiro. Ademais o paseo marítimo permite contemplar algunhas das estampas e paisaxes máis bonitas de Redondela. Por outra parte, o areal de Cesantes acolle con frecuencia actividades náuticas, tanto en inverno coma en verán. Por último, esta zona é de marisqueo e, por tanto, un espazo de traballo e de vida para moitas familias redondeláns. O respecto ao medio natural, así como dos lugares de traballo, é obrigatorio para todas as persoas.
